Home اختار انهو قسم في حاسبات ؟!
Post
Cancel

اختار انهو قسم في حاسبات ؟!

img which dept to choose

اختار أي قسم ؟ ايه القسم المناسب ليا ؟

في البوست دا ان شاء الله هحاول أوضح الفرق بين الـ 4 اقسام الموجودين في الكلية و بالنسبة لـ كفر الشيخ فقط و ليس عموماً..

عشان الناس الل بتسأل علي أي قسم فيه هروب من البرمجة و يكون نظري اكتر .. او الناس الل بتدور علي الأقسام الموجود فيها برمجة اكتر و متعمقة اكتر و ليست نظري

قبل ما أتكلم عن كل قسم لوحده حابب بس أوضح نقطة .. الموضوع مش زي ما الناس مغيرة أسماء الأقسام و ان قسم IT مسمينه قسم الشبكات و قسم cs قسم الالجوريزمز ولا IS قسم النظري .. الموضوع مش كدا خالص

  • قسم IT : باختصار هتطلع مهندس IT في شركة .. يعني لو فيه شركة كبيرة فيها موظفين كتير و لكل موظف جهاز و الشركة مقسمة لاقسام و معامل و فروع .. وظيفتك كمهندس IT انك تظبط أجهزة الموظفين لكل واحد حسابه الخاص بيه و تكون قادر تعمل troubleshooting و تعمل شبكة ما بينهم و تربط الفروع ببعض و تحافظ علي سرية و امان الشبكة دي و الكلام دا عمومي جدا يعني فيه تفاصيل اكتر بكتير انصحك تشوف كل مادة لوحدها كمان هتتعرض لكورسات زي CCNA – MCSA – System administration – A+.. واضح من الكلام انك هتدرس networks اكتر من الأقسام التانية و كمان هتدرس security و الكلام دا هتدرسه فعلا في حاسبات كفر الشيخ .. لان زي ما وضحت في الأول انا بوضح فكرة القسم عموما في أي كلية و بكتب البوست لحاسبات كفر الشيخ فقط يعني مش أي قسم IT عشان تعرف هتدرس ايه. بالنسبة لمواد سنة 3 التيرم الأول ف هي مواد عامة و ضرورية لاي قسم يعني كل الأقسام هتدرس معاك نفس المواد ممكن انت تاخد المواد دي في التيرم الأول و هما ياخدوها في التيرم التاني او علي حسب توزيع خطة و جدول الكلية يعني التيرم الأول بالنسبالك مش هتفرق معاك سواء كنت في أي قسم .. مثال :
    • كل الأقسام هتدرس مادة operation research .. مش هقولك تاني خد اسم كل مادة و شوف بتعمل ايه في جوجل .. و انصحك تسأل زمايلك الل اكبر منك عن مدرس المادة و هتستفاد ايه عشان تكون علي دراية بكل شيئ هتاخده في الكلية و دا بالنسبة لكل المواد طبعا
    • كل الأقسام هتدرس في سنة 3 مادة computer architecture بعد ما درست logic & circuits في سنة تانية المادة دي مهمة لان بعد ما عرفت الهاردوير بيشتغل ازاي هتعرف ازاي الهاردوير بيتصل بالسوفروير في ادني level و هتدرس assembly و في نهاية المادة هتكون صورة عامة عن ازاي الكمبيوتر مجرد قطعة حديد ازاي بتنطق و تفكر (هتعرف صورة عامة فقط) هتعرف كمان basics عن ازاي الرامة او البروسيسور بيشتغل و هكذا و مجرد حجات خفيفة يعني مش هتدرس microprocessor مثلا و الكلام دا
    • كل الأقسام هتدرس software engineering و دي مادة نظري عن كيفية العمل الجماعي في مشاريع البرمجيات و طرق إدارة فرق المطورين و الأساليب المختلفة زي waterfall & agile methodologies و غيرها كتير من طرق إدارة و بناء البرمجيات و توزيع العمل علي المطورين و ازاي الشغل بيتم في الشركات الكبيرة و البرامج الكبيرة اللي بيكون فيها مئات المطورين شغالين علي بروجكت واحد
    • عندك مادتين computer graphics & image processing مش كل الأقسام هتدرس المادة دي و المفروض المفروض المفروض تعرف تعمل image processing و الكلام دا كله .. لكن هتدرس في الكلية معلومات كويسة جدا برضو عن الجرافيكس .. متتصورش في دماغك انك هتعمل مثلا تطبيق retrica بعد ما تخلص :D يعني متوسعش احلامك لان الكلية بتحطك علي اول الطريق فقط و كمان الوقت ضيق لكل كورس ف شوف الل تحبه و كمل فيه
    • كمان هتدرس 3 مواد خاصة بالشبكات في التيرم التاني سنة 3 و هنا هتبدأ تعرف الفرق ما بينك و بين الأقسام التانية لان الأقسام التانية بياخدوا مادة شبكات واحدة فقط .. لكن قسم IT بيتوسع في المجال دا
    • هتدرس multimedia يعني معالجة صوت و صورة بس هنكتفي بالصوت بس :D هتدرس الصوت و امتداداته و ازاي بيتم ضغطه و تشغيله و الصور و امتداداتها و انواعها و خصائصها و ازاي الصوت بيتجمع مع الصورة عشان يكون فيديو و فيه قسم تاني هيدرس نفس المادة .. عاوز اوصلك بس فكرة ان فيه مواد مشتركة كتير و مفيش انعزال الأقسام الموجود في بالك و دا هيوضحلك لو قريت باقي البوست و باقي الأقسام
    • البرمجة المرئية : في حاسبات كفر الشيخ درسنا ازاي نعمل برامج سطح المكتب باستخدام الدوت نت يعني في نهاية الكورس لو انت طالب متوسط (مش دحيح خالص و مش كاره الكلية) ممكن تعمل برامج زي برامج المبيعات في المحلات و برامج الصيدليات و برامج الديسك توب عموما (المادة دي مشتركة مع اقسام تانية مش خاصة فقط بقسم IT)
  • قسم CS دا الأساس بتاع الكلية يعني أي حد بيقول انا معايا bachelor in computer science يعني دا الكل × الكل و باقي الأقسام معمولة عشان تخدم متطلبات السوق
    • دا قسم البرمجة يعني هتدرس algorithms اكتر يعني برمجة اكتر .. فيه مواد مشتركة طبعا ما بين كل الأقسام زي ما كتبت في ملحوظات قسم IT يعني برضو هتدرس operation research – software engineering – architecture operating systems .. مش شرط يكون كل المواد مشتركة بين كل الأقسام ..
    • القسم دا يعني برمجة خام يعني واحد بنضارة قعر كوباية قاعد يتعلم machine learning – statistics – artificial intelligence – pattern recognition – computer vision .. عارف البوستات بتاعة الذكاء الصناعي دي كلها ؟ الكلام داه تشبع منه في القسم دا ممكن تكمل علي دراسة الكلية و تاخد كورسات ال AI و تعمل علي سبيل المثال self driving car او التطبيقات الموجودة في الفيديوهات المبهرة الل بنعملها share
    • طيب دا الافتراضي .. لكن الواقع انك هتاخد الحجات دي لكن مش بالاحلام الموجودة في بالك بس هتعرف طريقك بعد ما تخلص الكورسات دي و تدرسها
    • بكرر تاني ان مفيش انعزال تام في الأقسام غير في اخر تيرم خالص .. عندك مثلا مادة software engineering كله بياخدها و زي تحليل عددي او numerical analysis المادة دي موجودة في كل الأقسام لكن فيه اقسام ممكن تاخدها اختياري و اقسام تانية اجباري .. و هكذا .. و ملحوظة صغيرة ليك (احنا معندناش اختياري لان الكلية صغيرة و جديدة ) ف هما هيختارولك المواد لكن انا بتكلم في العموم
    • فيه مواد اختياري ممكن تدرسها زي visual programming و انا شرحت المادة دي درسنا فيها ايه و هتقدر تعمل ايه بعد ما تخلصها (شرحتها في اول البوست في مواد قسم IT)
    • لو فيديو واحد فقط عن اسم كل مادة هتعرف القسم بيتكلم عن ايه
    • طبعا الكلام مختصر لان المواد مكررة ف ياريت تقرا البوست كامل مش بس الجزء الخاص بالقسم
  • قسم IS القسم دا يعني نظم معلومات يعني تكون قادر انك تعمل نظام معلوماتي كبديل لاي نظام ورقي المفروض تطلع منه طالب عندك القدرة علي انك تروح أي مكان تقول انا ممكن اعمل نظام يختصر علي الناس و يعمل كذا كذا سواء هتدرس نظم معلومات جغرافية - نظم دعم اتخاذ القرار - وهكذا .. دا تعريف بلدي و مختصر
    • سنة 3 برضو غالبيتها مواد مشتركة مع اقسام تانية زي تطوير البرمجيات و الممارسة المهنية المادة دي موجودة في قسم software engineering و موجودة في IT
    • مواد سنة 3 معظمها مفيش جديد عن قسم IT او CS زي ما تم شرح كل مادة فوق operation research – architecture – visual programming – software engineering
    • التيرم التاني القسم فيه 3 مواد متخصصة مش في الأقسام التانية (موجودين اختياري في اقسام تانية لكن مش اساسية) المواد : نظم المعلومات الجغرافية – استراتيجية و إدارة و اكتساب نظم المعلومات – نظم دعم اتخاذ القرار
    • مادة مشتركة مع باقي الأقسام (شبكات الحاسب) و دي اصلها IT لكن كل الأقسام بتدرسها سواء في تيرم اول او تاني او علي حسب توزيع الكلية ممكن 3 اقسام مع بعض في اول تيرم و القسم الرابع ياخدها في تاني تيرم او ممكن الدفعة كلها .. علي حسب الكلية
    • في سنة 4 يبدأ التخصص و هتلاقي ان القسم المواد الخاصة بيه مائلة اكتر ناحية الـ data science مع متطلباتها زي الـ database بكل أنواعها .. استخلاص معلومات مفيدة من big data و هكذا ودا فعلا تخصص القسم
  • قسم software engineering .. دا القسم المفضل بالنسبالي : خفيف و لذيذ و مواد فهم كويسة و كل المواد تقريبا الموجودة فيها انا شرحتها في الأقسام التانية
    • لو عندك تصور ان القسم فيه architecting & design كبرمجة ف المفهوم دا مش بالظبط كدا لكن القسم مايل اكتر اكتر ناحية management of software projects هتدرس مادة أساسية مشتركة مع باقي الأقسام هتوضحلك غرض القسم software engineering و المادة نظري و بتوضح agile methodologies و خلافه زي ما شرحتها فوق و مادة تانية ليها نفس الغرض من قسم cs و هي مادة software construction و هتعرف طريقة عمل ال compilers و ازاي بنكتب لغات برمجة بتتحول ل assembly
    • انت قبل كدا درست assembly and computer architecture و قبلها درست logic and circuits و أخيرا درست الـ compiler ازاي بيشتغل يعني تقريبا عرفت ازاي جملة hello world ازاي يتم ترجمتها من اول ما كتبتها في الـ IDE و تم ادخلها ازاي علي الكيبورد لحد ما عملت دايرة logic يعني من خلال 3 مواد عرفت رحلة البرمجة من اول high level programming لحد سريان الكهرباء و الالكترونات في السلوك و عرفت صورة عامة و اعتقد لو وصلك التصور ف دا المطلوب من الكلية
    • هتدرس كمان نظم تشغيل و دي مادة مشتركة و بتخدم جدا النقطة الل فوق بتاعة رحلة ال plain text من الضغط علي الكيبورد لحد سريان الكهرباء في السلوك (و دي متعة حاسبات و هنا سر القوة بين حاسبات و غيرها)
    • باقي المواد المتخصصة للقسم دا واضحة جدا من عنوانها بس لو قريت دليل الكلية

فيه مواد علي حسب دكتور المادة .. في قسمنا SE درسنا حجات دكتور المادة نفسه اضافها و شافها مهمة و كانت فعلا مهمة git - design patterns - secrets of php regardless of ASP and dot net - windows API - distributed systems يعني الموضوع معتمد علي الدكتور اكتر من اسم المادة :D

فيه نقطة حابب أأكد عليها تاني و انا بشرح الأقسام فوق .. هتعرف ان سنة 3 عبارة عن مواد مشتركة

ما بين كل الأقسام يعني الل هتدرسه في أي قسم .. فيه اقسام تانية هتدرسه و دا في معظم المواد باختلاف مادة او اتنين في في كل قسم .. يعني لما تطلع من 3 هيكون فرق الدراسة بينك و بين زميلك في أي قسم مش كبير و مش متخصص لدرجة كبير .. و دا يوضح حاجه مهمة خالص .. التخصص الكلي في سنة 4 يعني السنة الأخيرة كل قسم هيدرس مواد مختلفة تماما عن القسم التاني .. يعني بالمختصر لو انت اخترت قسم بالغلط و مش حابه او جالك غصب عنك ف الفروقات مش كتير لانها مجرد سنة واحدة تخصصية

دا لينك جروب اكبر دفعة .. انا هقبل أي حد يعمل join للقسم لو حد عاوز يسأل أي حاجه في الجروب .. الناس في الدفعة بتاعتنا متعاونة و بيساعدوا أي حد

فيه دليل للكلية بيتوزع في شئون الطلبة فيه اللايحة الخاصة بالكلية و القوانين الخاصة بيها + مواد كل قسم في في كل تيرم و عدد الساعات المخصصة لكل مادة .. انصحك تشوف الدليل و ليه لينك تحميل تحت البوست و تشوف اسم كل مادة و تشوف في جوجل هي بتتكلم عن ايه و ايه المواضيع الخاصة بكل مادة و هتعرف نوع الدراسة و طبيعة القسم و المواد الخاصة بيه

لو جالك قسم مش رغبتك و انت ماشي في track معين .. كمل عادي في الـ track الل انت ماشي فيه لان القسم مش هيعطلك و مش هيدوك مواد من طب بيطري مثلا !! بالنسبالي كنت بحب البرمجة جدا و بدور علي قسم مذاكرش كتير فيه و اعتمد علي معلوماتي اكتر لو انت geek ف انا كتبت سوفروير – علوم حاسب – تكنولوجيا معلومات – نظم معلومات .. و مكانش فارق معايا اول او تاني رغبة و الحمد لله جاتلي اول رغبة و مش ندمان علي اختياري و القسم بتاعي فعلا قسم خفيف و الـ staff كان حلو

نقطة كمان انك تشوف ال staff لكل قسم و تحط الموضوع دا في بالك عشان ممكن تكون بتفهم من دكتور اكتر من التاني و هكذا

المعيدين ناس من سننا تقريبا أتكلم مع أي حد هيفيدوك جدا و انا شايف انهم friendly جدا مع الطلبة ف ممكن تستشير المعيدين مش الطلبة عشان محدش يتوهك و يكون ملوش خبرة او ينصحك بناء علي تجاربه الشخصية ف بلاش تستشير طلبة

نصيحة أخيرة .. اطحن نفسك تعليم من دلوقتي .. فات عليك سنتين في الكلية و فاضلك سنتين و هتحصل نفس كمية التعليم الل اتعلمتها في اول سنتين يعني اطحن نفسك تعليم في أي تراك بتحبه

 

This post is licensed under CC BY 4.0 by the author.